బ్లాకౌట్‌ బాంబ్‌!.. మిస్టీరియస్‌ మిసైల్‌ను ప్రదర్శించిన డ్రాగన్‌
- శత్రు దేశాల విద్యుత్తు వ్యవస్థలే లక్ష్యం
బీజింగ్‌: పొరుగు దేశాలతో కయ్యానికి కాలుదువ్వుతున్న చైనా గురువారం కొత్త రకం గ్రాఫైట్‌ బాంబు (బ్లాకౌట్‌ బాంబు)ను ప్రదర్శించింది. ఇది శత్రు దేశాల విద్యుత్తు స్టేషన్లను నాశనం చేసి లక్షిత ప్రాంతంలో కరెంట్‌ లేకుండా చేయగలదని చైనా చెప్తున్నది. ఈ ఆయుధాన్ని గ్రాఫైట్‌ బాంబుగా చైనా సెంట్రల్‌ టెలివిజన్‌ (సీసీటీవీ) గుర్తించకపోయినప్పటికీ గ్రాఫైట్‌ మందుగుండుకు ఉండే లక్షణాలను అది కలిగి ఉన్నట్టు స్పష్టమవుతున్నది. భూమిపై ఓ వాహనం నుంచి ఈ బాంబును ప్రయోగించడంతో దాని నుంచి సిలిండర్‌ ఆకారంలో ఉన్న 90 చిన్న బాంబులు (సబ్‌మ్యునిషన్స్‌) బయటికి దూసుకొచ్చినట్టు చూపుతున్న ఓ యానిమేటెడ్‌ వీడియోను సీసీటీవీ తన సోషల్‌ మీడియా చానల్‌లో షేర్‌ చేసింది.
ఆ చిన్న బాంబులు గగనతలంలో పరస్పరం ఢీకొని పేలిన తర్వాత హై-ఓల్టేజీ విద్యుత్తు వ్యవస్థల్లో షార్ట్‌-సర్క్యూట్‌ కలిగించేందుకు రసాయనికంగా శుద్ధి చేసిన కార్బన్‌ ఫిలమెంట్లను వెదజల్లినట్టు కనిపిస్తున్న ఆ వీడియో ప్రస్తుతం ‘ఎక్స్‌’లో వైరల్‌ అవుతున్నది. కనీసం 10 వేల చదరపు మీటర్ల ప్రాంతంలో విద్యుత్తు సరఫరాకు అంతరాయం కలిగించడం ద్వారా శత్రు దేశాల కమాండ్‌, కంట్రోల్‌ వ్యవస్థలకు విఘాతం కలిగించడమే ఈ బ్లాకౌట్‌ బాంబు లక్ష్యమని సీసీటీవీ పేర్కొన్నది. ‘దేశీయంగా తయారైన మిస్టీరియస్‌ టైప్‌ మిసైల్‌’గా దాన్ని అభివర్ణించింది. కానీ, ఆ ఆయుధం లేదా దాని స్థితికి సంబంధించిన ఇతర వివరాలేమీ వెల్లడించలేదు. షేర్‌ చేసిన వీడియో ప్రకారం.. 490 కిలోల బరువైన వార్‌హెడ్‌తో కూడిన ఈ ఆయుధం 290 కి.మీ. పరిధిని కలిగి ఉంటుందని, సైనిక సబ్‌స్టేషన్లు, ఇతర విద్యుత్తు మౌలిక వసతులపై దాడులకు అనువుగా ఉండేలా ఈ బాంబును రూపొందించారని తెలుస్తున్నది.
తైవాన్‌కు ముప్పు?
చైనా ఆవిష్కరించిన బ్లాకౌట్‌ బాంబుతో తైవాన్‌ విద్యుత్తు గ్రిడ్‌కు ముప్పు ఉంటుందని సోషల్‌ మీడియాలో చాలా మంది ఊహాగానాలు చేస్తున్నారు. బ్లాకౌట్‌ బాంబులు తైవాన్‌ రక్షణ వ్యవస్థలను నిర్వీర్యం చేయగలవని భావిస్తున్నారు.
పొరుగు దేశాలతో కయ్యానికి కాలుదువ్వుతున్న చైనా గురువారం కొత్త రకం గ్రాఫైట్‌ బాంబు (బ్లాకౌట్‌ బాంబు)ను ప్రదర్శించింది.
